Barakaldok prestakuntza eskaintzen die enpresa txiki eta ertainei Laneko Arriskuen Prebentziorako

Osalanek diruz lagundutako programa hau merkataritza, ostalaritza eta zerbitzuen sektoreetako tokiko enpresa txikiei zuzenduta dago.

Enpresa espezializatu batek jarriko du abian ekimena, eta gainera enpresetako prebentzio-jarduera kudeatzeko beharrezko tresnak eskainiko ditu.

Barakaldo, 2021eko urriaren 27a

Barakaldoko Udalak Laneko Arriskuen Prebentzioari buruzko prestakuntza-programa bat eskainiko du, Osalan Laneko Segurtasun eta Osasunerako Euskal Erakundeak diruz lagunduta, udalerriko enpresa txikientzat. Ekimen honen helburua da langileen segurtasunaren eta osasunaren babes-maila handitzen laguntzea, lan-istripuak eta lanbide-gaixotasunak saihesteko, bai eta prebentzioaren integrazioa sustatzea ere enpresako maila guztietan, eta prebentzio-kultura sustatzea, enplegatu guztien parte-hartzea erraztuko duena.

David Solla Sustapen Ekonomikoko zinegotziak adierazi duenez, “zenbait kasutan egiaztatu dugu lan-arriskuen kudeaketa gai konplexua izaten dela enpresa txikientzat, denbora eta dedikazioa eskatzen baititu. Programa honen bidez, enpresan prebentzio-estrategia bat abian jartzea erraztuko dieten tresna nahikoak jarri nahi ditugu zuen eskura, eta proiektu osoaren bideragarritasunerako duten garrantziaz kontzientziatu”.    

Laneko arriskuen prebentzioari buruzko oinarrizko prestakuntza-ikastaro hori diseinatzea, antolatzea eta ematea enpresa espezializatu baten ardura izango da, eta parte hartzen duten tokiko enpresei beren enpresetan prebentzio-jarduera kudeatzeko aukera emango dieten edo kontratatuta duten kanpoko prebentzio-zerbitzuarekin duten harremana erraztuko dieten ezagutzak eta tresnak eskainiko dizkie.

Programa Barakaldoko enpresei zuzenduta dago, baldin eta lantoki bakar batean 25 langile baino gehiago ez badituzte eta haien jarduera merkataritzaren, ostalaritzaren eta zerbitzuen sektoreei badagokie. Ikastaroa azaroaren 8an hasiko da, astelehena, eta hilaren 25era arte iraungo du, gehienez 15 enpresak parte hartuta.

Prestakuntza aurrez aurre emango da Inguraldek Innobak Beurkon dituen bulegoetan (Beurko Viejo, 3 - Pab. 38), 2,5 orduko 12 saioen bidez (30 orduko iraupena guztira), 14:30etik 17:00etara, astelehenetik ostegunera. Interesa duten enpresek Inguralderen webgunean eskuragarri dagoen buletinaren bidez formalizatu behar dute izen-ematea, eta posta elektronikoz bidali Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko. helbidera.

Prestakuntzaren edukia

Zehazki, enpresa parte-hartzaileek 5 moduluren bidez jasoko dute prestakuntza: laneko segurtasunari eta osasunari buruzko oinarrizko kontzeptuak; arrisku orokorrak eta horien prebentzioa; sektoreko arrisku espezifikoak eta horien prebentzioa; kudeaketako oinarrizko elementuak; eta lehen sorospenak.

Prestakuntza espezializatuaz gain, ikastaro hau eginez, parte hartzen duten enpresa eta negozioek aukera izango dute Laneko Arriskuen Prebentzioari lotutako hainbat tresna lortzeko, hala nola Laneko Arriskuen Prebentzioa Osalani jakinaraztea (OS-2 eredua), Laneko Arriskuen Prebentzio Sistemaren auditoria (OS-3 eredua), Laneko Arriskuen Prebentzio Plana, Laneko Arriskuen Ebaluazioa, Prebentzio Zerbitzuaren Plangintza eta Zaintza, besteak beste.  

Interesa duten enpresek Inguralderen ohiko bideetatik eska dezakete ikastaroari buruzko informazio guztia: 944789395 – 944789400 - Helbide elektroniko hau spambot-etatik babestuta dago. JavaScript gaituta izan behar duzu ikusi ahal izateko.