Inguraldek 375.000 euro igo du sustapen ekonomikorako aurrekontua
Erakundeak aurkeztu du kreditu gehigarriaren eskaera lau hilean behingo Jarraipen Kontseiluan, eta, beraz, Barakaldon jarduera ekonomikoa sustatzera bideratutako guztizko zenbatekoa milioi erdi eurokoa izango litzateke.
Kontsumo-bonuen kanpainek hartzen dute aurrekontuaren zatirik garrantzitsuena, eta, ondoren, hiria "smartizatzeko" eta ekintzailetza mentorizatzeko proiektuek.
Barakaldo, 2021eko maiatzaren 18a
Inguraldeko Zuzendaritza Kontseiluak 375.000 euroko kreditu gehigarria eskatu du atzo goizean egindako lau hilean behingo jarraipen-bileran, ekonomia sustatzeko ekintza berriak abian jartzeko. Zenbateko horrekin, Barakaldoko Udalak milioi erdi euro bideratuko ditu guztira 2021ean hiriko enpresa-sarea dinamizatzeko eta laguntzeko.
"Barakaldoko Udalaren jarduera garrantzitsuenetako baten aurrean gaude sustapen ekonomikoaren arloan", adierazi du David Solla Sustapen Ekonomikoko zinegotziak. "Baina oso argi daukagu hiriak inbertsio mota hori behar duela pandemia osteko egoera berrira bermeekin iristeko".
Ildo horretan, eskatutako kreditu berriak udalerriko enpresei laguntzeko hainbat proiektu abiaraztea ahalbidetuko du, hala nola 2021erako aurreikusitako kontsumo-bonuko bi kanpainak – Udaberrian eta udazkenean –, 250.000 euroko aurrekontu-zuzkidura izango dutenak, edo tokiko kontsumoa dinamizatzeko kanpaina berri bat, kontsumitzaileentzako zuzeneko sariekin.
Gainera, Inguraldek lokal hutsak berreskuratzeko proiektu bat ere aurreikusten du, jarduerarik gabeko eremuetan enpresa-proiektuak kokatzeko; baita "Smart City" ekimenarekin eta ekintzailetzaren mentorizazioarekin lotutako hainbat proiektu ere; eta ahaztu gabe hiriaren erronka berritzaileei erantzuteko ideien eta proiektu pilotuen lehiaketaren deialdia.
Ekintza horien guztien bidez, indartu eta osatu egiten da hirian ekosistema berritzaile eta kolaboratzaile bat sortzearen aldeko apustua, herritarren, enpresen eta Barakaldon ekiteko ideiak eta borondatea dutenen parte-hartze aktibo eta bateraturako, adierazi du Smart Ekonomia Sustapen eta Hiri Garapeneko zinegotziak, David Sollak.
Inguralderen jarduera lehen lauhilekoan
Inguraldek bere jarraipen txostenean azpimarratu duenez, 2020ko jarduera COVID19k markatu zuen erabat, eta gogorarazi du 2021eko lehen lauhilekoa ezin dela oraindik "pandemiaren ostekotzat" jo. Atalka, enpleguari laguntzeari dagokionez, 537 pertsonari eman zaie arreta lanpostu bat bilatzeko; ekintzailetzari laguntzeari dagokionez, berriz, 79 pertsonari eman zaie aholkularitza, eta 70 enpresa-ekimen aurkeztu dira. Eremu horretan bertan adierazten da Innobak enpresen hiru zentroen okupazioa % 63koa dela.
Merkataritzari, ostalaritzari, hiri-enpresa txikiari eta zerbitzuei laguntzeko zerbitzuan, hainbat ekintza berritzaile jarri dira abian, hala nola "Barakaldo Store" online salmentarako plataforma eta "Barakaldo Kontsumo Bonoa" bono-kontsumoko lehen kamera. Bestalde, KIUBek 416 kontsulta eta 152 erreklamazio-espediente artatu ditu urteko lehen lauhilekoan.
Azkenik, ETEei laguntzeari dagokionez, nabarmentzekoa da Barakaldo Makers elkartearekin lankidetza-hitzarmena sinatu izana, eta BK Enpresak programaren barruan Barakaldoko enpresak digitalizatzeko, nazioartekotzeko eta berritzeko aurreikusitako ibilbideak abian jarri izana. Hori guztia "Smart City" hiri-garapenaren eremuan garatutako jarduerek osatzen dute.