Barakaldok topaketa zuzen berriak antolatu ditu enpresekin langabetuei lan aukerak errazteko

Datorren maiatzaren 29an, INNOBAK Beurko zentroan, bigarren jardunaldi bat egingo da, Bizkaiko Foru Aldundiaren Laguntzen 3R Programaren barruan, langabeen laneratzea sustatzeko, oraingo honetan eraikuntzaren sektorera bideratuta.  

Gainera, enpresentzako zerbitzuetan espezializatutako CLECE konpainiarekin lankidetzan, Inguraldek % 33ko desgaitasuna aitortuta duten pertsonei berariaz zuzendutako enplegu-azoka birtual batean parte hartzeko aukera emango du, maiatzaren 21ean, asteazkenarekin.

Barakaldo, 2025eko maiatzaren 20a

Barakaldok beste topaketa bat hartuko du datorren ostegunean, maiatzaren 29an, Bizkaiko Foru Aldundiaren Laguntzen 3R Programaren barruan, langabezian geratu diren pertsonei lan-aukera berriak sortzea helburu duena. Hitzordua INNOBAK Beurko enpresaren instalazioetan izango da, 10:00etatik 12:00etara, eta BUILD: INN – Eraikuntzaren Klusterrak parte hartuko du.

"Apirilean Valoriza enpresarekin egin genuen 3R Programaren lehenengo deialdian izandako parte-hartzearen arrakastaren ondoren, ziur gaude BUILD: INNrekin izandako bilera arrakastatsua izango dela", ziurtatu du David Solla Inguraldeko presidenteak. "Igeltserotza, pintura, iturgintza edo elektrizitate enpleguetan dauden aukerez ari gara, eta, beraz, erantzun zabala espero dugu", adierazi du.

Ildo horretan, Sollak gogorarazi du 90 pertsona (35 emakume eta 55 gizon) joan zirela Valoriza kale-garbiketako enpresarekin egindako topaketaren deialdira. Topaketa horretan, udan – ekainetik irailera – 10 edo 12 peoi aldi baterako kontratatzea erraztu zen, bai eta urtean zehar plantilla ordezkatzeko beharrak estaltzeko lan-poltsa bat sortzea ere.

BUILD: INNekin egiten den bileraren kasuan, eraikuntzako gremioekin lotura duten langabeen parte-hartzea sustatzeaz gain, arkitekturako, delineazioko eta aparejadoreko kualifikazioa duten pertsonak ere deituko dira. Kasu horretan, deitutakoek Barakaldoko Udalaren egungo eta iraganeko enplegu-planetan parte hartu behar izan dute.

Inguraldek eraikuntzarekin lotutako profil guztien arteko komunikazio aktiboko prozesu bat gauzatuko duen arren, edonork eska dezake topaketara joatea. Horretarako, Inguralderekin harremanetan jarri behar dute soilik, ohiko kanalen bidez (webgunea, telefonoa edo posta elektronikoa), maiatzaren 28a baino lehen. 

Enpleguaren azoka birtuala CLECErekin

Bizkaiko Foru Aldundiaren 3R Laguntza Programari lotutako deialdi honetaz gain, Inguralde hainbat topaketa zuzen sustatzen ari da enpresekin. Enplegu-azoka birtuala maiatzaren 21ean izango da, eta % 33ko desgaitasuna aitortuta duten pertsonek parte har dezakete bertan. Ekimena CLECE konpainiarekin lankidetzan egiten da, enpresentzako zerbitzuak eskaintzen baititu.

Kasu horretan, Inguraldek dagozkion profilei buruzko informazioa jaso ondoren, CLECE harremanetan jarriko da interesdunekin, bere plataforman erregistratuko ditu eta, ondoren, hitzordua emango die online elkarrizketa bat egiteko. Inguraldeko Enplegu Zentroak bere ekipo eta instalazioak jarriko ditu eskuragarri, behar duten pertsonei elkarrizketak egiteko.

Aipatzekoa da maiatzean bertan Inguraldek Eroskik joan den ostiralean, hilak 9, egin zuen azoka presentzialean parte hartzeko aukera eman ziela interesatuei, gaur egun dituzten enplegu-premiei erantzuteko: 750 pertsona baino gehiago behar omen ditu Bizkaiko dendetan lan egiteko. Ekitaldia kooperatibak Artean eta Bilbondon dituen instalazioetan izan zen, eta frutagintzako, harategiko, okindegiko, urdaitegiko, kutxako eta birjarpeneko esparruetan kontratazioa erraztera bideratuta egon zen.