4.000 lagun inguruk gozatu dute San Tomas Egunaz Barakaldon

Azoka honen lehen edizioa arrakastatsua izan da hirian, eta hasierako partaidetza-aurreikuspenak gainditu ditu; horregatik, Inguralde bigarren edizio batean ari da lanean.

Joan den larunbatean Barakaldok bere lehen San Tomas Eguna ospatu zuen. Inguralde Barakaldoko tokiko garapen agentziak bultzatutako ekimen bat izan da, barakaldarrei aukera eskaintzeko Barakaldotik irten gabe jai tradizional honetaz gozatzeko. "Esperientzia pilotua izan da hau eta oso pozik gaude; horregatik, datorren urteko edizioa prestatzeari ekin diogu jada", aurreratu du David Solla Barakaldoko Ekonomia Sustapeneko zinegotziak.

Azoka Anaiak parkean egin zen eta 4.000 barakaldar inguru erakarri zituen han jarritako karpara. Larunbat goizean eguraldi ona izan zenez, 300 metro koadroko karpa txiki geratu zen, taloak eta txakolina dastatzera joan ziren adin guztietako pertsonen kopurua ikusita. 

Azokako ekoizleek eta hornitzaileek produktuak birjarri behar izan zituzten, izakinak agortu egin baitziren. "Bai txorizoarekin egindako talo postuan, bai produktu gastronomikoen salmentan, hainbatetan generoa birjarri behar izan zuten eskari handia zela eta", adierazi du zinegotziak. 

Lehen San Tomas Egunaren ospakizunak ere eragin handia izan zuen inguruko ostalaritzan, sinergia ekonomikoak sortuz inguruko lokaletan. "Hori ere gure helburuetako bat zen, alegia, merkataritza- eta ostalaritza-jarduera sustatzea eta bultzatzea, San Tomas eguna bezain garrantzitsua den egun batean", azaldu du Sollak. 

Hala, Inguralde bigarren San Tomas Eguna prestatzeko lanean hasi da dagoeneko, postu eta eskaintza ludiko, kultural eta gastronomiko gehiagorekin haztea helburu. "Kontua ez da Bilbokoa bezalako beste azoka batzuekin lehiatzea, baizik eta Barakaldoko bizilagunentzako eskaintza bihurtzea. Horregatik, San Tomas Egun hau etorkizuneko edizioetan Ezkerraldean erreferentzia bilakatzea espero dugu", bukatu du Ekonomia Sustapenerako zinegotziak.